Стотина деца денеска трчаа во Градскиот парк во Скопје на деветтата хуманитарна трка „Подај рака на лицата со Вилсон“. Традиционално, се одржаа три трки: штафетна, детска и трка за миленици.
Како што рекоа организаторите од „Вилсон Македонија“, целта на трката е да се подигне свеста на јавноста за Вилсоновата болест, да се поттикне социјална вклученост на лицата кои се соочуваат со оваа ретка болест и да се поттикнат што повеќе луѓе на рекреација.
„Горди сме што успеавме да се избориме за доедукација на лекари за подобро препознавање и третирање на болеста, обезбедување неопходни лабораториски тестови кои се често недостапни во државава и за поврзување и поддршка на пациенти и семејства кои сигурно во одреден момент, исто како и јас и моите, се чувствувале сами на светов борејќи се со ретка болест. Овие семејства сега веќе не се сами и изолирани“, вели Ања Босилкова-Антовска, заменичка-претседателка на „Вилсон Македонија“.
