Цели четири часа траеше големото карневалско дефиле во Струмица на кое своите маски ги претставија повеќе од 2.000 учесници од земјава и странство. Разновидни креации и музичко-сценски настапи, презентираа карневалџиите, потсетувајки дека Струмица е балканскиот Рио со својот раскош, убавина и посетеност.

Атмосферата ја надополнија и карневалџиите од Словенија, Црна гора, Србија, Бугарија, Албанија, Русија и Аруба. (Фото: Ѓ. Личовски)

„Бевме слушнале, но ова што го видовме вечерва навистина нè импресионира. Имате карневал кој е далеку поинтересен од нашите во Бугарија. Ова е балкансиот Рио“, кажа Станислава Илиева од Софија која со сопругот и пријатели специјално за карневалот допатувале во Струмица.

По завршување на дефилето, карневалџиите ги запоседнаа угостителските капацитети каде имаше разновидни забави под маски. (Фото: Ѓ. Личовски)

Сите маски кои беа презентирани, како што тврдат учесниците, бил рачно изработени, а пренесуваа пораки на љубов, забава, игра, чување на природата, културата. Атмосферата ја надополнија и карневалџиите од Словенија, Црна гора, Србија, Бугарија, Албанија и Русија, додека учесниците од Аруба со своите пердувести маски и звуците на самба ги разиграа струмичани.

Странските гостите велат дека се изненадени од гостопримливоста и ниските цени на градот за време на карневалот. (Фото: Ѓ. Личовски)

„За првпат доаѓаме и сме изненадени, како од карневалот, така и од карневалскиот ритам што го има градот, гостопримливоста и ниските цени. Дојдовме завчера и ова е вистинско место за забава под маска. Ќе пренесеме дека најдобриот карневал на Балканот е во Струмица“, истакна Горан Соиќ од Белград
Десетици илјади посетители го следеа големиот карневал во Струмица, а потоа ги запоседнаа угостителските капацитети каде имаше разновидни забави под маски.

В. Трајков