Лидерот на Сојузот на Ромите Амди Бајрам во анкетниот лист пријавил единствено моторно возило Пежо 4007 со вредност од 1,8 милиони денари и кредит на име на децата во износ од 1,8 милиони денари, покажаа податоците за имотната состојба на функционерите, кои Државна комисија за спречување корупција ги објави вчера за новите пратеници.

Неговиот син Елвис Бајрам, кој е градоначалник на општина Шуто Оризари, исто така, според податоците објавени од Државна комисија за спречување корупција, пријавил само куќа во Скопје на име на родителите со вредност од 1,8 милиони денари.

Принтскрин од веб сајтот на Државната комисија за спречување корупција со анкетните листови на Елвис и Амди Бајрам.

На веб сајтот на Државна комисија за спречување корупција ги има новите анкетни листови на Никола Груевски и Зоран Заев, кои беа избрани за пратеници на изборите на 11 декември.

Лидерот на ВМРО-ДПМНЕ пријавил заштеди од околу 230.000 евра, околу 5.000 евра долг на кредитна картичка и 33 уметнички слики вредни речиси 11.000 евра. Првиот човек на СДСМ на свое име пријавил само побарување од 70.000 евра. И двајцата немаат пријавено недвижен имот на свое име.