Министерот за внатрешни работи Оливер Спасовски кажа дека минатонеделната тепачка во Охрид, во која беше повреден секретарот на бугарскиот клуб „Борис Трети“ е дел од хибридна војна против Македонија. Според него, цел на хибридната војна е да се блокираат евроинтеграциите на земјата.

„Луѓе од иста групација се и оние кои тепаат и оние кои се тепани. Тоа ја докажува таа хибридна војна. Секое инкриминирачко дејство што се прави државата реагира во овој дел и ние кажуваме дека не може во ниту еден момент, ниту еден граѓанин, без разлика на национална, верска, политичка и било која друга припадност да биде физички нападнат и да биде малтретиран. На тоа државата јасно ќе се спротивстави и ќе преземе мерки какви што презема и во овој случај. Иако се обидуваат да ни накалемат, дека државата не презема мерки за некоја категорија на граѓани, дека не води ефикасни истраги, што не е точно“, рече Спасовски во гостувањето во емисијата „Утрински печат“.

И пренесувањето на повредениот во болница во Софија со бугарски владин авион е дел од сценарио, смета министерот.

„Секако дека ова е креирање на сценарио за да се покаже наводна грижа. Истата грижа, дури и подобра, може да ја добие во здравствените установи во Македонија“, рече Спасовски.

Спасовски вели дека во државата, но и надвор, постојат елементи кои не посакуваа да бидеме членки на НАТО и сега не посакуваат да бидеме во ЕУ и дека нивните активности се зголемиле од почетокот на руската инвазија на Украина.