Кривичниот совет на Одделението за гонење организиран криминал и корупција при Основниот суд Скопје 1 ја прифати гаранцијата во недвижен имот на поранешниот министер за внатрешни работи Митко Чавков и му ја укина мерката притвор, соопшти Судот.

На Чавков, кој е еден од обвинетите за организираниот напад во Собранието на 27 април минатата година, му се определени мерки на претпазливост: одземање на патна исправа и обврска еднаш неделно да се јавува во судот.

Чавков ќе биде пуштен од истражниот затвор во Шутка по правосилноста на решението и запишување на гаранцијата, додаваат од Судот.