Со 78 гласа „за“, Собранието денеска ги усвои измените на Законот за пензиското и инвалидското осигурување со кои што линеарно ќе се зголемат пензиите за 5.000 денари. Зголемувањето е по 2.500 денари во септември годинава и март догодина.

Ваквото линеарно зголемување на пензиите беше изборно ветување на владејачката ВМРО-ДПМНЕ.

За понатаму останува досегашната методологија за усогласување на пензиите со трошоците на живот двапати годишно (март и септември). Усогласувањето се прави според процентот кој се добива како збир на порастот на индексот на трошоци на живот во претходното полугодие и процентот на порастот на просечно исплатена плата на сите вработени во државата во однос на полугодието кое му претходи.

Претходно на денешната седница заврши расправата за Предлог законот за изменување и дополнување на Законот за локалната самоуправа, по скратена постапка, за кој е потребно двотретинско мнозинство, но гласањето ќе биде дополнително.