Во Основниот кривичен суд Скопје денеска беше осуден и вториот напаѓач на градоначалничката Данела Арсовска, при увидот на дивоградбите во Чаир, обвинетиот Реџеп Нуредини.

Но за разлика од напаѓачот Сулејман Љамалари кој претходно доби две години затвор, Нуредини си ја призна вината, искажа каење за нападот и доби условна казна затвор, две за пет години. Тоа значи дека условната казна затвор во траење од две години нема да се реализира, ако Нуредини не стори друго кривично дело во следните пет години.

Нуредини е осуден за кривично дело насилство што го стори на 11 јули годинава кога таа беше физички и вербално нападната за време на обиколка на дивоградби во скопски Чаир.

„Обвинетиот Нуредини денеска покажа искрено каење за стореното, за неговото грубо однесување кон градоначалничката. Но и таа покажа доблест да му прости на обвинетиот за стореното. Дури и не се приклучи кон кривичниот прогон, ниту пак најави имотно-правно побарување, што помогна за изречената максимална алтернативна казна во случајот. Вети дека ќе се чува од такви испади во иднина. Очигледен беше неговиот придонес за ефикасно завршување на оваа кривична постапка“, го пофали адвокатот својот клиент Нуредини, по завршувањето на постапката.

Претходно Сулејман Љамалари цврсто ги негираше обвинувањата дека ја нападнал Арсовска и рече оти тој во случајот не бил напаѓач, туку жртва. Според неправосилната пресуда, Љамалари тој ден пристигнал со електричен тротинет и ја нападнал градоначалничката физички и вербално, нанесувајќи ѝ телесни повреди и упатувајќи сериозни закани.Тој е во постапка на жалба пред Апелациониот суд Скопје.

С. К. ДЕЛЕВСКА