Специјалното обвинителство за 18 предмети поднесе 17 обвиненија против 94 физички и 7 правни лица. „Таргет“ и “Тврдина“, за нелегалното прислушување на илјадници граѓани, се споени во едно обвинение. Според поднесените барања за притвор, се работи за обвинети кои сториле кривични дела во областа на полнолетни лица, но и кривични дела од областа на организираниот криминал и корупција. Оттаму по поднесувањата на обвиненијата и барањата за притвор денеска ќе треба да одлучуваат двата кривични совета во Основниот суд Скопје 1, и тој од одделот за кривични дела за полнолетни, и кривичниот совет во одделот за организиран криминал.
И двата совета имаат рок од 24 часа да одлучат за секое од барањата за притвор. Обвинетите за кои ќе падне одлука за мерка притвор, ќе мора веднаш да бидат уапсени и спроведени во Шутка, зашто жалбата не го одлага извршувањето на мерката. Притворените може да се жалат пред надлежниот Апелационен суд Скопје.
СЈО побара притвор за 18 лица, меѓу кои:
За случајот „Титаник“, побаран е притвор Никола Груевски, Мартин Протоѓер, Кирил Божиновски, Миле Јанакиески и Гордана Јанкулоска.
За случајот „Тендери“, побаран е притвор за Елизабета Канческа Милевска.
За случајот „Тотал“, побаран е притвор за Драган Павловиќ Латас.
За случајот „Траекторија“, побаран е притвор за Владимир Пешевски.
За случаите „Тврдина“ и „Таргет“, побаран е притвор за пет лица, меѓу кои и Сашо Мијалков.
СЈО натовари едно комбе, како прва тура картонски пакети со докази и тие се веќе на пат кон Основниот суд Скопје 1. На денешниот прес можеше во СЈО да се видат купишта кутии со копии од докази, во врска со поднесените обвиненија.
