Уставниот суд ќе оди докрај со иницијативата со која би се турнале сите постапки за разрешување на судии по стариот Закон за Судски совет, по кој последен од функцијата е разрешен поранешниот претседател на Врховниот суд Јово Вангеловски. На последната седница иницијативата против стариот и непостоечки закон (бидејќи има нов), не е отфрлена.
Напротив, Уставниот суд одлучил да организира подготвителна седница на која ќе бидат повикани експерти. Но, ова е оставено за по изборите кои се закажани на 15 јули, откако ќе се знае кој ќе победи. Стари иницијативи со години чекаат да дојдат и никако или едвај по 3-4 години доаѓаат на ред, а во меѓувреме на седница им се пробива пат на новоподнесените иницијативи.
Поради ваквото калкулирање на деветтемина, а од април осум уставни судии, но и од ефикасноста и стручноста на повеќето од судиите во редовното судство, и најновата анкета на Националниот демократски институт од САД спроведена во јуни, е поразителна во однос на судството. Целосна доверба во судството имаат едвај 2 проценти од анкетираните.
По 8 месеци седење во фиока откако беше одржана расправата, Уставниот суд за гласање утре го ставил членот 353 за злоупотреба на службената положба и овластувањата, за јавните набавки. Со него подносителот бара да се намали почетната казна затвор од 5 години на 4, со што би застареле случаите на СЈО, во кои се обвинети Никола Груевски, Миле Јанакиески, Гордана Јанкулоска, Елизабета Канческа-Милевска и други, но и истрагите за финансиски криминал од милионски суми кои се веќе распоредени од страна Државниот обвинител Љубомир Јовески.
С. К. ДЕЛЕВСКА
