Околу 49 илјади граѓани досега се пријавени за вакцина против сезонски грип, а набавени се 80.000 дози четиривалентна вакцина од холандскиот производител „Абот“. Вакцинацијата почна на 16 октомври, а пријавувањето продолжува на vakcinacija.mk.
Првиот ден  биле вакцинирани 2.000 граѓани. Вакцинацијата против сезонски грип се спроведува на 35 вакцинални пункта низ државата, од кои пет пункта се во Скопје.

Денеска во Гостивар, на Одделението за епидемиологија во Гостивар, министерот за здравство Азир Алиу прими вакцина против сезонски грип.

„Денес сум во мојот роден Гостивар, каде се вакцинирав и преку личен пример сакам да ја истакнам важноста од навремената вакцинација, како најефикасна превентивна мерка за заштита на здравјето. Апелирам граѓаните навреме да се заштитат од сезонскиот грип, посебно ги повикувам лицата, кои спаѓаат во ризични групи население да се пријават преку апликацијата vakcinacija.mk и кај својот матичен лекар“, рече Алиу.

Со бесплатната вакцинација се опфатени ризичните категории население, како што се повозрасни лица над 65 години, лица со хронични заболувања, здравствени работници, бремени жени, деца на возраст од 6 месеци до 5 години, како и лицата сместени во установи за социјална заштита на стари лица и вработените во овие установи.