Цената на дизелот и другите горива на бензинските пумпи е намалена за речиси 30 отсто од нивото од пред шест месеци, но тоа не се одрази на цените на производите во малопродажба. Дизелот, кој се користи во транспортот и има големо влијание при формирање на цените во малопродажба, во јуни беше 110 денари, а денеска е 79,5 денари.

Дополнително, од 1 декември, производителите на храна плаќаат повластена цена на електрична енергија, но засега не се исполнуваат очекувањата на Владата за намалување на цената на прехранбените производи за барем 10 отсто.

И последните официјални податоци за трошоците за живот од Државниот завод за статистика покажуваат дека поскапувањата продолжуваат, независно од цените на горивата и енергенсите.

Во ноември, споредено со октомври, повисоки цени има кај месото, рибата, млекото, минералната вода, газираните пијалаци, соковите од овошје и зеленчук, сирењето и урдата, кафето, чајот, јајцата, шеќерот, џемот, медот, чоколадата, пивото и кај лебот и житата. Ретко поевтинување има кај овошјето и кај маслото за јадење.

По поголемите маркети, цените на основните прехранбени производи остануваат на исто високо ниво, а некои се и дополнително поскапени.

Векна бел леб, која сега тежи помалку од 500 грама, е над 50 денари. Свежото свинско месо во зависност од видот и квалитетот се движи од 350-500 денари, јунешкото од 700-800 денари и пилешкото од 300-500 денари. Трајното млеко и понатаму е во опсег од 80-90 денари, а кашкавал не може да се најде под 500 денари.