Хрватскиот претседател Зоран Милановиќ, за време на неговата прва официјална посета на Македонија по стапувањето на функцијата на претседателката Гордана Сиљановска – Давкова, рече дека државата не треба да биде жртва на изнудувања во замена за членство во Европската Унија. Тој додаде дека не е дојден да дели совети, но кажа дека не сите совети кои доаѓаат од соседите, меѓународната дипломатија или од ЕУ се паметни и корисни.

„Вие сте тие кои ќе одлучите што е важно за вас. Само немојте да бидете жртва на некаква принуда, изнудување, кога станува збор за членството во ЕУ“, изјави Милановиќ на заедничката прес-конференција со Сиљановска – Давкова во Вила Водно.

Претседателката Сиљановска – Давкова кажа дека Копенхагенските критериуми се тие што ќе ја направат земјата „стандардна европска, досадна држава“, додавајќи дека ветото не е пријателски инструмент.

„Очекувам разбирање, а се разбира ние во меѓувреме мора да ја тераме државната агенда, економски, културно да се развиваме“, рече Сиљановска – Давкова.

Таа ги оцени односите со Хрватска како традиционално пријателски, нагласувајќи дека соработката во сите сфери напредува. Сиљановска – Давкова потсети и на поддршката од Хрватска за време на нејзиното претседателство со ЕУ во 2020 година, кога земјава, заедно со Албанија, направи исчекор во евроинтеграциите.