Володимир Зеленски предвреме ја напушти Белата куќа по тензичниот состанок со Доналд Трамп и Џеј-Ди Венс, кои жестоко го нападнаа. Од Белата куќа соопштија дека е откажана планираната прес-конференција на Трамп и Зеленски, на која требаше да се потпише договор за ретки минерали.
Портпаролот на Белата куќа потврди дека договорот не е потпишан. Според висок американски функционер, Трамп не ја отфрла можноста за склучување договор, но бара конструктивен разговор од Украина.
Веднаш по завршувањето на состанокот, Трамп се огласи на својата социјална мрежа.
„Зеленски покажа непочитување кон САД во нашиот ценет Овален кабинет. Може да се врати кога ќе биде подготвен за мир“, напиша Трамп, кој не го испрати Зеленски при излегувањето од Белата куќа.
Зеленски изрази благодарност до американскиот народ, но не се осврна директно на неговата средба со Трамп и Венс во објавата на Икс.
„Ти благодарам Америка, ти благодарам за поддршката, ти благодарам за оваа посета. Ви благодариме Претседателе, на Конгресот и американскиот народ“, напиша Зеленски. „На Украина ѝ треба праведен и траен мир, а ние работиме токму за тоа“.
Зеленски денеска пристигна во Вашингтон со цел да го потпише договорот за ретки минерали, што Трамп го смета за клучен за брзо завршување на војната во Украина, но состанокот во Белата куќа заврши лошо за украинскиот претседател откако мораше да се брани од жестоки вербални напади. Меѓу другото, Трамп и Венс го обвинија дека е неблагодарен и не покажува почит кон САД и му порачаа да го потпише договорот или САД целосно ќе ја повлечат поддршката за Украина.
„Нема да биде убаво, но ќе се изборите“, му кажал Трамп на Зеленски.
Полска, Франција и Шпанија се меѓу европските земји кои реагираа по бурната средба во Белата куќа, давајќи им поддршка на Зеленски и Украина.
Заменик-претседателот на рускиот Совет за безбедност, Дмитриј Медведев, рече дека Зеленски беше „жестокo искаран“ во Овалната соба, додавајќи дека Русија „мора да ја запре воената помош“ на Украина. Новинарите на руската државна телевизија изгледаа шокирани од пропаднатиот разговор меѓу Трамп и Зеленски, но задоволни од коментарите на Трамп. Дописникот на државниот информативен канал „Русија 24“ по состанокот рече дека „јасно е дека не може да се зборува за какви било испораки или дополнително оружје“, за Украина и Зеленски „си заминува без ништо“. Тој рече дека Зеленски „впрочем отишол да си купи палто“, мислејќи на коментарот на Трамп кој го прашал украинскиот лидер зошто не носи костум.
