Пропадна референдумот во Берлин на кој граѓаните се изјаснуваа за планот со кој градот би се обврзал да стане климатски неутрален до 2030 година, изјави градоначалничката Франциска Гифај. Мерките би ја принудиле новата конзервативна градска власт да инвестира многу во обновлива енергија, ефикасност на зградите и во јавен превоз.

Доколку успееше, Берлин ќе станеше еден од неколкуте големи европски градови со законски обврзувачка цел да стане јаглеродно неутрален во следните години.

„Резултатот покажува дека мнозинството берлинци сметаат дека барањата на референдумот не би можеле да се спроведат, дури и ако се претворат во закон“, изјави Гифај.

Референдумот беше тест дали Германците, не само берлинците, сметаат дека националната климатска политика е преамбициозна. Таа предвидува една од најголемите европски економии да стане јаглеродно неутрална до 2045 година. За разлика од некои претходни референдуми во Берлин, вчерашниот ќе беше законски обврзувачки за локалната влада, но иницијативата собра 441.000 гласови „за“ од потребните најмалку 608.000.