Холандскиот фудбалер Анвар Ел Гази доби отказ од германскиот прволигаш Мајнц поради пост на социјалните мрежи за актуелниот конфликт помеѓу Израел и Хамас. Ел Гази беше суспендиран на 17 октомври откако објави пост кој беше сфатен како пропалестински настроен.

„Загубата на работата е ништо во споредба со пеколот што се истура врз невините и ранливите во Газа. Застанете за она што е исправно, дури и ако тоа значи да останете сами“, напиша Ел Гази на Икс по раскинувањето на договорот.

Клубот потврди дека го избркал Ел Гази поради неговите објави на социјалните мрежи.

„Ел Гази зазеде позиција за конфликтот на Блиски Исток на начин што не може да се толерира во клубот“, соопшти Мајнц.

Стадионот на Мајнц го носи името на еден од основачите на клубот Еуген Саломон, кој почина во Холокаустот во 1942.