Двократната олимписка шампионка во биатлон Лаура Далмаер загина за време на планинарење во Пакистан. Триесет и едногодишната Германка била погодена од одрон од камења при експедиција во планините Каракорам. Несреќата се случила на височина од околу 5.700 метри.

Веднаш била покрената спасувачка акција, во која учествувале експерти од Германија и САД, но била попречена од лоши временски услови. Од менаџерската компанија на Далмаер потврдија дека таа починала.

Далмаер, која била искусна планинарка, ја претставуваше Германија на две олимпијади, освојувајќи две злата и една бронза во Пјеонгчанг во 2018. Покрај тоа, таа освои уште 15 медали на големите натпреварувања, а се пензионираше во мај 2019.

Германскиот претседател Франк-Валтер Штајнмаер рече дека Далмаер беше „амбасадор на нашата земја низ целиот свет и пример за мирен, радосен и фер соживот преку границите“.