Новиот олимписки шампион Диего Колоња им оддаде почит на скијачите од егзотичните зимски нации, како Мексико, Тонга и Еквадор, со што трката на 15 километри во Пјонгчанг се претвори во голема прослава на олимпискиот дух.

Последен на целта пристигна Мексиканецот Херман Мадрасо, по што беше кренат на раменици од други скијачи, вклучувајќи го и Колоња. Тој му честиташе и на Тонгоанецот Пита Тауфатофуа што го остварил својот олимписки сон, потсетувајќи на гестот на легендарниот Бјерн Дели, кој на Олимпијадата во Нагано во 1998 го пречека во целта Кениецот Филип Боит.

Без разлика што на Мадрасо му требаа 26 минути повеќе од Колоња за да ја заврши трката, тој влезе во целта со високо кренато мексиканско знаме, додека публиката го отпоздравуваше.

„Убаво е да се видат сите овие скијачи од повеќе од 60 нации. Ние се бориме за медали, но некои се водат исклучиво од олимпискиот дух и тоа е прекрасно“, кажа Колоња.

На трката настапија и Бразилецот роден во фавела Виктор Сантос и Еквадорецот Клаус Јунгблут Родригес.

„Многу сум среќен, ова беше мој голем сон и сметам дека е големо постигнување што за првпат ја однесов мојата земја на Зимска олимпијада“, изјави Јунгблут.