Албанската министерка со вештачка интелигенција е бремена, објави премиерот Еди Рама. Зборувајќи на конференцијата „Глобален дијалог“ во Берлин, Рама ги објави плановите за создавање 83 „деца“ на Диела, односно асистенти, по еден за секој пратеник од неговата Социјалистичка партија.

„Презедовме голем ризик со Диела и се снајдовме многу добро. Диела е првпат бремена и тоа со 83 деца“, рече Рама.

Тој појасни дека „децата“ или асистентите ќе бележат сè што се случува во парламентот и ќе ги информираат пратениците за дискусиите или настаните што ги пропуштаат.

„Тие ќе служат како асистенти на пратениците, ќе учествуваат на парламентарните седници и ќе водат евиденција за сè што се случува. Овие деца ќе го имаат знаењето на нивната мајка“, рече Рама, очекувајќи системот да биде целосно оперативен до крајот на 2026 година.

Рама објасни како ќе функционираат асистентите со вештачка интелигенција.

„На пример, ако одите на кафе и не се вратите на работа, ова дете ќе ви пренесе што било кажано додека не сте биле во салата и ќе каже на кого треба да му контрирате“.

Албанија минатиот месец го претстави првиот владин министер со вештачка интелигенција на светот, кој треба да ѝ помогне на земјата да се ослободи од корупција. Рама тогаш кажа дека на Диела ќе ѝ бидат доверени сите одлуки за јавните тендери, што ќе ги направи „100 проценти без корупција“. Од своето лансирање во јануари, Диела е прикажана како жена облечена во традиционална албанска облека.