Американската влада ја дели еден ден од тоа да остане без пари откако Претставничкиот дом синоќа не го усвои ревидираниот план за трошење предложен од Републиканците, со кој би се спречило нејзиното затворање.

За предлог-законот беше потребно двотретинско мнозинство, но тоа не беше постигнато откако против него гласаа и 38 републиканци, заедно со најголемиот дел демократски застапници.

Новоизбраниот американски претседател Доналд Трамп го спречи претходниот договор за финансирање што спикерот на Претставничкиот дом Мајк Џонсон, кој е републиканец, го склучи со демократите. Договорот беше жестоко критикуван и од Илон Маск, кој ќе има функција во новата администрација на Трамп.

Закон одобрен од Трамп предвидуваше поврзување на владиното финансирање со двегодишната суспензија на ограничувањето на федералниот долг, што лидерот на Демократите во Домот, Хаким Џефрис, го опиша како смешно.

Спикерот Џонсон сега мора да смисли нов предлог, за што му останува многу малку време.

Гаснењето на владата беше навестено уште во септември, кога не помина предлогот на Џонсон за шестмесечно продолжување на финансирањето. Место тоа, Конгресот изгласа закон поддржан од двете партии за финансирање на владата до 20 декември.