Документ за американските безбедносни гаранции за Украина е 100% спремен и Киев чека време и место за да го потпише, изјави Володимир Зеленски, навестувајќи дека разговорите САД-Украина-Русија во Абу Даби дале некои резултати.

„За нас, безбедносните гаранции се, пред сè, гаранции од Соединетите Американски Држави. Документот е 100% готов и чекаме нашите партнери да ги потврдат датумот и местото кога ќе го потпишеме. Тој документ потоа ќе биде испратен на ратификација во американскиот Конгрес и во украинскиот парламент“, изјави Зеленски на прес-конференција за време на посетата на Вилнус.

Во петокот и саботата, руските и украинските преговарачи ги имаа првите трилатерални разговори со САД од почетокот на војната, каде што се дискутираше за американската рамка за завршување на војната, но никаков договор не беше објавен. Сепак, Москва и Киев кажаа дека се отворени за натамошен дијалог, па нова средба би требала да се одржи на 1 февруари во Абу Даби, изјави еден американски функционер.

„Во Абу Даби се разговараше за проблематичните прашања од американскиот мировен план. Имаше многу проблематични прашања, сега се помалку“, кажа Зеленски.

Тој рече дека Москва сака да направи сè што е можно за да ја натера Украина да ги напушти источните региони што Русија не можеше да ги освои досега.

„Територијалниот интегритет на Украина мора да се почитува. Ова се две фундаментално различни позиции – украинската и руската. Американците се обидуваат да најдат компромис“, рече Зеленски, додавајќи дека сите страни мора да бидат подготвени за компромис.

Тој исто така кажа дека Украина сака членство во Европска Унија до 2027 година, што го нарече „економски безбедносни гаранции“.