Американските сили треба да се повлечат од своите последни бази во Ирак до утре, што се слави како победа од страна на Иран и неговите сојузници, кои сега имаат длабоко влијание во земјата, каде што загинаа 4.500 Американци за повеќе од две децении војна.

Ирачките безбедносни експерти велат дека повлекувањето, договорено во 2024 од претседателот Џо Бајден, би можело да им даде на Иран и на неговите моќни сојузници одврзани раце и истовремено да им дозволи на другите непријатели на САД да се вратат, вклучително и Исламска држава.

Абу Моџтаба ал-Јасири, командант на Исламскиот отпор во Ирак, група вооружени фракции поддржани од Иран, го опиша повлекувањето на САД како „историска победа за ирачките исламски групи на отпор и чесните Ирачани и катастрофален пораз за американскиот проект“.

„На 30 септември ќе ги прославиме свртувањето на црната страница во историјата на Ирак и неуспехот на окупаторите да ја наметнат својата волја врз нашата земја. Ирак докажа дека неговиот суверенитет не може да се обезбеди од странски сили, туку од отпорот и волјата на неговиот народ“, изјави Ал-Јасири.

Иако заминувањето на американските сили е широко поддржано од Ирачаните, оние кои се загрижени за силата на проиранските групи стравуваат дека повлекувањето е прерано.

Американските сили го нападнаа Ирак во 2003 за да го соборат диктаторот Садам Хусеин, а потоа ја окупираа земјата и воспоставија влада, пред да се повлечат на крајот на 2011. Тие се вратија за помалку од три години за да им помогнат на ирачките сили да ја победат сунитската милитантна група Исламска држава во голема војна од 2014 до 2017 година.

Двојно повеќе Американци загинаа во „Операцијата Ирачка слобода“ отколку во паралелната војна во Авганистан, која заврши со ненадејното повлекување на САД во 2021.

Во последниве години, Ирак беше единствената земја што одржуваше блиски политички и воени сојузи и со САД и со Иран, кои понекогаш ја користеа ирачката територија како посредничко бојно поле.