Опозициската партија Обични луѓе (ОлаНО), која ја темелеше својата програма на борбата против корупција, победи на парламентарните избори во Словачка.

Таа освои речиси 25% гласови, откако благодарение на својата антикорупциска агенда значително ѝ порасна рејтингот во изминатите недели.

Една од главните теми во кампањата беше убиството на истражувачкиот новинар Јан Куцијак и на неговата свршеница во 2018 година. Полицијата го поврза нивното убиство со корупциските теми што ги истражуваше младиот Куцијак.

Партијата Смер-СД, која доминираше во словачката политика цела деценија, собра само 18% гласови. Премиерот Петер Пелегрини го призна поразот.

Парламентарните избори уследија откако лани за претседателка беше избрана Зузана Чапутова, уште еден борец против корупција.