Поранешниот американски претседател Џо Бајден почнал со зрачна терапија за рак на простата, кој му беше дијагностициран во мај, соопшти неговиот портпарол во саботата наутро.

„Како дел од планот за лекување на ракот на простата, претседателот Бајден во моментов е подложен на терапија со зрачење и хормонска терапија“, изјави портпаролот.

Веста првично ја објави телевизијата „Ен-Би-Си“.

Според портпаролот, се очекува новиот круг на третмани со зрачење да трае пет недели. Ова претставува нова фаза во лекувањето на поранешниот претседател, кој веќе примаше хормонска терапија во форма на таблети, како што самиот јавно изјави пролетва.

На Бајден во мај му беше дијагностицирана „агресивна форма“ на рак на простата, кој се проширил и на неговите коски. Демократот ја напушти Белата куќа во јануари, откако републиканецот Доналд Трамп победи на претседателските избори во 2024 година.

Откако ја доби дијагнозата, Бајден изјави дека е оптимист за прогнозата и дека „очекувањата се дека ќе успееме да го победиме ова“.

Експретседателот, кој следниот месец ќе наполни 83 години, се врати во својот дом во Делавер по завршувањето на мандатот. Во септември, тој имаше и хируршка интервенција за отстранување на канцерогени клетки од кожата.