Белата куќа објави дека секој медиум кој одбива да го користи новото име на Мексиканскиот Залив кажува лаги и порача дека новинарите на новинската агенција „Асошиејтед прес“ (АП) и натаму нема да смеат да присуствуваат на претседателските настани.

Веднаш по враќањето во Белата куќа, Доналд Трамп потпиша извршна наредба за преименување на Мексиканскиот Залив во Американски Залив. АП соопшти дека ќе продолжи да го користи името Мексикански Залив зашто е препознатливо низ целиот свет.

„Факт е дека водното тело покрај брегот Луизијана е наречено Американски Залив и не знам зошто некои медиуми не сакаат да го ословуваат така“, изјави портпаролката на Белата куќа Керолајн Ливит.

Овој залив делумно опфаќа води кои не припаѓааат на САД и стотици години се нарекува Мексикански Залив.

„Активностите преземени од оваа Бела куќа очигледно беа наменети да ја казнат АП за содржината на нејзиниот говор. Тоа е меѓу најосновните начела на Првиот амандман на Уставот, дека владата не може да им се одмазди на јавноста или на медиумите за она што го велат“, рече Џули Пејс, потпретседателка и извршна уредничка на АП, во приговорот до шефицата на кабинетот на Белата куќа Сузи Вајлс.

Во вторникот, на известувачите на АП не им беше дозволено да присуствуваат на настани во Белата куќа, а подоцна и на инаугурацијата на новата шефица на националното разузнавање Тулси Габард.

И весниците „Њујорк тајмс“ и „Вашингтон пост“ кажаа дека ќе продолжат да го користат името Мексикански Залив.