Белата куќа одби да го нарече Владимир Путин диктатор и место тоа, продолжи да го напаѓа Володимир Зеленски.

„Трамп е многу фрустриран од Зеленски моментално, од фактот дека не седнал на маса и не покажал волја да ја прифати оваа можност што ја нудиме. Се надевам дека Украинците ќе се вразумат и наскоро ќе ја прифатат“, изјави советникот за национална безбедност Мајк Волц на брифинг во Белата куќа.

Тој не одговори директно на новинарско прашање дали Путин е диктатор, туку додаде:

„Можеме цел ден да дискутираме за она што се случило во минатото“.

Односите помеѓу САД и Украина значително се влошија во изминатите два дена откако Трамп прво ја обвини Украина за почеток на војната со Русија, на што Зеленски му возврати дека живее во меур од руски дезинформации. Трамп потоа го нарече Зеленски диктатор кој не распишува избори и има многу низок рејтинг меѓу Украинците.

Трамп ја притиска Украина да потпише договор за ретки минерали, според кој САД би добиле украински природни ресурси во вредност од 500 милијарди долари, вклучувајќи нафта и гас.