Велика Британија воведе санкции за проруска група, за која вели дека е одговорна за обидот да се намести референдумот во Молдавија на 20 октомври и да ја дестабилизира нејзината демократија.

Молдавија порано беше дел од Советскиот Сојуз, но нејзините врски со Русија се влошија бидејќи молдавската влада го забрза својот обид за интеграција во Европската Унија. Молдавската влада ја обвини Русија дека сакала да влијае врз претседателските избори, на кои победи прозападната претседателка Маја Санду, и врз референдумот на кој се бараше поддршка за членството во ЕУ. Русија ги негираше обвинувањата.

Британскиот министер за надворешни работи Дејвид Леми кажа дека санкциите се однесуваат на невладината организација со седиште во Русија „Евразија“ и на нејзиниот основач Нели Парутенко.

„Британија нема да ги игнорира обидите да се поткопа демократијата во земјите кои ги смета за пријатели и партнери. Кога валканите пари течат слободно, тоа ја нагризува довербата на јавноста, ги дестабилизира економиите и им овозможува на малигните актери да го срушат владеењето на правото“, рече Лами.

Велика Британија претходно изјави дека Москва користи дезинформации, незаконско финансирање и политичка субверзија за да ја деградира демократијата во Молдавија. Санду ги поздрави санкциите како „јасен сигнал дека субверзијата има последици“.