Бугарскиот парламент денеска ја изгласа новата влада, што ќе ја предводи Росен Жељазков, поранешниот спикер на парламентот.

ГЕРБ на Бојко Борисов победи на изборите во октомври, седми во последните четири години, но мораше да води тешки преговори со други партии за формирање коалиција. Жељазков, кој беше предложен од најголемата парламентарна група ГЕРБ-СДС, во средата го доби мандатот од претседателот Румен Радев.

Жељазков доби поддршка од 125 пратеници во парламентот со 240 места, со што новата влада ќе може да почне со работа.

Најсиромашната членка на ЕУ и една од најкорумпираните држави во Европа имаше низа нестабилни влади откако протестите против корупција во 2020 ја соборија коалицијата на Борисов.

Бугарија на 1 јануари влезе во Шенген зоната, но плановите за придружување на еврозоната двапати беа одложени поради висока инфлација. Жељазков денеска вети дека неговата влада ќе ѝ помогне на земјата да ја усвои единствената европска валута.

Новата бугарска влада ќе има 19 министри, при што министер за надворешни работи ќе биде Георг Георгиев.