Градоначалникот на Киев, Витали Кличко, го прогласи петок за ден на жалост по денешниот руски воздушен напад, во кој загинаа најмалку 17 луѓе, меѓу кои и четири деца. Тој кажа дека продолжува спасувачката операција во округот Дарницки, каде што делумно се урна една станбена зграда, во која живееле 120 луѓе.
„Ова е еден од најголемите напади врз градот во изминатите месеци“, кажа Кличко.
Првите експлозии во центарот на Киев се слушнале во три часот, а вториот бран напади уследил во 5:30 часот, при што биле погодени повеќе од 20 локации. Шефот на воената управа на Киев, Тимур Ткаченко, кажа дека се повредени најмалку 48 луѓе.
„Загинатите деца се на возраст од две до 17 години. Очекуваме бројот на загинати да расте зашто спасувачките екипи и натаму извлекуваат луѓе од урнатините“, рече Ткаченко.
Во нападот се оштетени и зградата на Британскиот совет и канцелариите на мисијата на Европската Унија во Киев.
„За време на ноќешниот напад, Русија гаѓаше и дипломати, што претставува директно кршење на Виенската конвенција. Оштетена е зградата на мисијата на ЕУ“, изјави украинскиот министер за надворешни работи Андриј Сибиха.
Украинската војска кажа дека денеска низ земјата биле соборени 563 од речиси 600 лансирани дронови, како и 26 од 31 испукан проектил. Руското министерство за одбрана објави дека во нападот се погодени воени индустриски капацитети и воздухопловни бази во Суми, Донецк, Запорожје, Днипро, Херсон и Харкив, а Киев не беше ни спомнат.
