Четири деца, вклучувајќи 11-месечно бебе, се пронајдени живи во џунгла во Колумбија, повеќе од две недели откако авионот со кој патувале се урнал во јужниот дел на земјата. Во несреќата загинале нивната 33-годишна мајка, пилотот и копилотот.

Владината агенција за добросостојба на децата соопшти дека добила информации од терен дека децата се пронајдени во добра состојба.

Авионот „цесна 206“ исчезнал во раните утрински часови на 1 мај, откако пилотот пријавил проблеми со моторот. По големата потрага во која учествувале над 100 војници, авионот бил лоциран во понеделникот и внатре биле пронајдени телата на тројца возрасни луѓе.

Но, децата од 11, девет и четири години, како и 11-месечно бебе го преживеале падот и тргнале низ џунглата во потрага по помош. Спасувачките тимови пронашле шишиња, остатоци од овошки што ги јаделе, како и импровизирано засолниште направено од стапчиња и гранки.

Регионот во кој што паднал авионот нема многу патишта и тешко е пристапен дури и преку река, па војската ги барала децата и со хеликоптери, што било отежнато од 40 метри високи дрвја и поројни дождови.

Веста за лоцирањето на децата ја потврди и колумбискиот претседател Петро.