Доналд Трамп повторно нагласи дека САД ќе го анектираат Гренланд, поздравувајќи ги резултатите од неодамнешните избори на островот.

„Мислам дека тоа ќе се случи. Ни треба Гренланд заради меѓународната безбедност“, кажа Трамп на средбата со генералниот секретар на НАТО, Марк Руте, во Белата куќа.

Руте додаде дека не сака да го вовлекува НАТО во овие разговори, но се согласи дека Гренланд има важна улога за безбедноста на Арктикот, за кој Русија и Кина исто така покажуваат голем интерес.

Гренланд е дел од данското кралство од 1953 година, откако повеќе од два века имаше статус на колонија.

„Данска е многу далеку од Гренланд. Таа мисли дека полага право на Гренланд само затоа што некој брод дошол таму пред 200 години или така нешто. Не знам дали е тоа вистина“, кажа Трамп.

Додаде дека САД веќе се воено присутни на Гренланд.

„Можеби ќе видите и повеќе војници како одат таму“, рече американскиот претседател, кој почна да му се заканува на Гренланд уште пред да се врати во Белата куќа.

Претседателот на комитетот за одбрана во данскиот парламент Расмус Јарлов го критикуваше однесувањето на Руте на средбата со Трамп.

„Не ни се допаѓа тоа што Руте се шегуваше со Трамп за Гренланд. Анексија би значела војна помеѓу две членки на НАТО. Гренланд тукушто гласаше против моментална независност од Данска и не сака никогаш да биде американски“, изјави Јарлов.