Владејачката конзервативна партија во Јапонија ја избра Санае Такаичи (64) за своја нова лидерка, позиционирајќи ја да биде првата премиерка на Јапонија. Такаичи е меѓу поконзервативните кандидати кои се наклонети кон десно од владејачката партија.

Поранешна министерка во владата, ТВ водителка и страсна тапанарка на хеви метал, таа е една од најпознатите личности во јапонската политика – и тоа контроверзна. Таа се соочува со многу предизвици, меѓу кои и справувањето со бавната економија и домаќинствата кои се борат со немилосрдна инфлација и стагнација на платите. Таа, исто така, ќе мора да се справи со нестабилните односи меѓу САД и Јапонија и да го заврши договорот за царини со администрацијата на Трамп, договорен од претходната влада.

Ако биде потврдена за премиерка, еден од клучните предизвици за Такаичи ќе биде обединувањето на партијата по неколку турбулентни години во кои беше потресена од скандали и внатрешни конфликти. Такаичи припаѓа на „тврдокорната“ фракција на ЛДП, која веруваше дека причината зошто поддршката за на Либерално-демократската партија (ЛДП) се намали е затоа што изгубила контакт со својата десничарска ДНК. Минатиот месец, премиерот Шигеру Ишиба, чиј мандат траеше нешто повеќе од една година, објави дека ќе се повлече по серијата изборни порази во кои владејачката коалиција на ЛДП го изгуби мнозинството во двата дома на парламентот.

Такаичи долго време ја обожава првата премиерка на Велика Британија, Маргарет Тачер. Таа сега е сè поблиску до исполнување на својата амбиција за „Железна леди“. Но, многу жени гласачи не ја гледаат како застапник за напредок.

„Таа се нарекува себеси јапонска Маргарет Тачер. Во однос на фискалната дисциплина, таа е сè друго освен Тачер. Но, како и Тачер, таа не е некој голем исцелител. Не мислам дека направила многу за да ја зајакне моќта на жените“, вели британски професор.

Такаичи е убедена конзервативка која долго време се спротивставува на носење закони што им дозволуваат на жените да ги задржат своите момински презимиња по бракот, велејќи дека тоа е против традицијата. Таа е исто така против истополовите бракови. Протеже на покојниот поранешен лидер Шинзо Абе, Такаичи вети дека ќе ја врати својата економска визија, позната како Абеномика – која вклучува високи фискални трошоци и евтино задолжување. Ветеранката од ЛДП е строга во врска со безбедноста и има за цел да го ревидира пацифистичкиот устав на Јапонија. Таа е исто така редовна посетителка на контроверзното светилиште Јасукуни каде што се одбележуваат жртвите од војната во Јапонија, меѓу кои и некои осудени воени злосторници.

Такаичи најверојатно ќе биде потврдена од парламентот, иако не автоматски како нејзините претходници, бидејќи владејачката партија е во многу послаба позиција откако го изгуби мнозинството во двата дома.