Досега непозната герилска група ја презеде одговорноста за бомбашкиот напад близу канцеларијата на Грчки железници во Атина во петокот, како и за уште една експлозија од минатата година. Во соопштение објавено на еден сајт, групата Револуционерна класна самоодбрана кажа дека нападот врз железничката компанија бил одговор на железничката несреќа во Грција во 2023, во која загинаа 57 луѓе.

Во експлозијата немаше повредени и значајна штета. Полицијата соопшти дека пред нападот имало анонимни повици до грчките медиуми со предупредување. Експлозијата се случи во близина на една од најпрометните сообраќајници во главниот град.

Левичарската група кажа дека нападот бил изведен поради недоволните вложувања и загриженоста за безбедноста во железницата, која беше приватизирана за време на должничката криза во земјата од 2009 до 2018. Таа исто така ја презеде одговорноста за напад врз министерството за труд во Атина во 2024, во кој немаше повредени откако полицијата ја евакуираше областа по претходна дојава.

Групата им ги посвети двата напада на Палестинците во Газа.

Грчката антитерористичка полиција ги истражува тврдењата на оваа досега непозната група, но не ги исклучува врските со групи кои беа активни во минатото.

Мали напади врз бизниси, полиција, политичари и амбасади се чести во Грција, која има долга историја на политичко насилство од левичарски и анархистички групи.