Жоел Ле Скуарнек, поранешниот хирург кој призна дека сексуално злоставувал стотици пациенти, главно деца, меѓу 1989 и 2014 година, е осуден на максимална казна од 20 години затвор. Тој ги призна обвиненијата во март.

Судијата Од Буреси рече дека судот го зел предвид фактот дека поранешниот хирург особено барал болни, ранливи и онесвестени жртви. Бидејќи Ле Скуарнек веќе одлежа седум години, тој ќе има право да побара условно ослободување до 2030 година. Неговиот адвокат Максим Тесиер рече дека Ле Скуарнек нема намера да се жали.

Ле Скуарнек (74) се смета за најголемиот педофил во Франција. Тој веќе беше во затвор откако во 2020 беше осуден на 15 години за силување и сексуален напад врз четири деца, вклучително и две негови внуки.

На поранешниот лекар му се судеше во Бретања од крајот на февруари и притоа сведочеа десетици негови жртви. Во март, Ле Скуарнек призна дека сексуално ги злоставувал сите 299 жртви, многумина додека биле под анестезија или се буделе по операциите. Тој водел дневници во кои детално ги опишувал нападите, што ѝ овозможило на полицијата да ги пронајде неговите жртви, од кои многумина не се сеќавале на злоставувањето.

Претходно овој месец тој рече дека е одговорен за смртта на две негови жртви, чии роднини рекле дека тие се самоубиле поради траумата од сексуалниот напад од Ле Скуарнек кога биле деца.