Еден од тројцата мажи обвинети за убиството на малтешката новинарка Дафне Карвана Галиција во 2017 година ја призна вината и беше осуден на 15 години затвор. Винсент Мускат ја призна својата вмешаност во поставувањето експлозивна направа под автомобилот на новинарката, која истражуваше случаи на корупција во земјата.

Многумина се сомневаат дека убиството било нарачано од елитните структури во Малта.

Мускат неочекувано го смени својот исказ денеска и се согласи да обезбеди дополнителни информации за убиството. Останатите двајца обвинети, кои беа присутни во судницата, одбиле да зборуваат.

Педесет и тригодишната Галиција три децении работеше како новинарка и отворено обвинуваше малтешки политичари и други функционери за корупција.