Адвокатот на Емануел и Брижит Макрон изјави дека тие ќе бараат значајна отштета од американската конзервативна инфлуенсерка Кендис Овенс ако таа продолжи да тврди дека првата дама на Франција е маж. Адвокатот Том Клер кажа дека тужбата за клевета поднесена вчера во суд во Делавер била последното средство по неуспешниот едногодишен обид да се стапи во контакт со Овенс.

„Секој пат кога го правевме тоа, таа им се потсмеваше на Макронови и на нашите напори да се каже вистината. Доста е, време беше да ја повикаме на одговорност. Бараме таа да го стори вистинското: да ја каже вистината и да престане да ги шири овие лаги“, рече Клер.

Емануел и Брижит Макрон се во брак од 2007, десет години пред тој да биде избран за претседател на Франција.

Тужбата против Овенс на 219 страници изложува обемни докази дека Брижит Макрон е родена како жена и отсекогаш била жена, рече адвокатот.

„Ќе го поднесеме нашето барање за отштета на судењето, но ако таа продолжи да ги повторува своите тврдења до почетокот на судењето, тоа ќе биде значителна сума“, рече Клер.

Макронови се запознале во средното училиште каде што тој бил ученик, а таа наставничка. Брижит Макрон тогаш била Брижит Озиер, мажена мајка на три деца.

Макрон се преселил во Париз во последната година од средното училиште, но ветил дека ќе се омажи за Брижит. Таа подоцна му се придружила во Париз и се развела пред да се венчаат. Првата дама го прослави својот 72. роденден во април.