„Ербас“ ќе приземји илјадници авиони откако било утврдено дека силна сончева радијација може да влијае врз компјутерите за контрола на летот во авионот, што доведе до одложувања низ целиот свет. Се верува дека ќе бидат погодени околу 6.000 авиони, половина од светската флота на оваа компанија, но тие ќе се вратат во функција по брзо ажурирање на софтверот.
„Ербас“ објави дека го открил проблемот за време на истрага на инцидент од минатиот месец, во кој авион кој летал од САД до Мексико нагло изгубил висина. Авионот на авиокомпанијата „ЏетБлу“ принудно слетал во Флорида, при што биле повредени најмалку 15 луѓе.
Унгарската нискобуџетна компанија „Визер“, која во базата на Скопскиот аеродром има стационирано пет авиони од типот „ербас А321 нео“ и одржува околу 60 проценти од вкупниот авиосообраќај во Македонија, лета исклучиво со флота од фамилијата „ербас 320“.
Портпаролката на компанијата за Ројтерс изјави дека веќе се закажани потребните ажурирања на софтверот и како резултат на тоа, некои летови ќе бидат засегнати во текот на викендот.
Покрај најдобро продаваниот модел на компанијата „А320“, проблемот ги погоди и авионите „А318“, „А319“ и „А321“. Се верува дека проблемот брзо ќе биде решен кај околу 5.100 авиони, со едноставно ажурирање на софтверот, што вообичаено трае три часа, но останатите 900 авиони, кои се постари модели, ќе останат приземјени подолго, додека физички не се заменат компјутерите во нив.
„Ербас“ призна дека ова ќе доведе до „оперативно нарушување за патниците и клиентите“ и се извини.
Јавно достапните податоци сугерираат дека „Ер Франс“ е погодена повеќе од која било друга авиокомпанија, при што биле откажани 50 од нејзините летови до и од Париз закажани за утрово. Во САД, „Американ ерлајнс“ соопшти дека проблемот погодил 340 нејзини авиони и дека се очекуваат оперативни одложувања.
Проблемот идентификуван кај авионите „А320“ се однесува на дел од компјутерскиот софтвер кој ја пресметува висината на авионот. „Ербас“ открил дека на големи надморски височини неговите податоци можат да бидат оштетени од силното зрачење што сонцето периодично го ослободува. Тоа доведе до инцидентот во октомври, кога авионот одеднаш ја изгубил висината, иако производителот рече дека ова е единствениот пат кога се случил инцидент од ваков вид.
