Европската Унија предупреди дека ќе ја третира Белгија како Унгарија ако продолжи да го блокира планот за користење на замрзнатите руски милијарди како заем за Украина.

На самитот на 18 декември, главната задача на лидерите на ЕУ ќе биде да го придобијат белгискиот премиер Берт де Вевер, кој досега се противеше на планот како да се соберат 210 милијарди евра за да се покрие огромната финансиска црна дупка во Украина. Дел од планот е да се искористат замрзнатите 140 милијарди евра руски средства, од кои најголем дел се наоѓа на сметките на белгискиот депозитар за хартии од вредност „Евроклир“.

Де Вевер сака ЕУ да обезбеди финансиски гаранции и зголемени заштитни мерки за покривање на потенцијални судски спорови и спогодби, на што се спротивставуваат многу влади. Белгија испрати список на амандмани што ги сака за да се осигура дека нема да биде принудена сама да ги враќа руските пари ако санкциите бидат укинати. Белгискиот премиер рече дека нема да го поддржи заемот за репарации ако неговите барања не бидат исполнети.

Де Вевер, кој првпат го блокираше планот на ЕУ во октомври, изјави дека Русија се заканила со „вечна одмазда“ ако Белгија дозволи да се користат овие средства.

„Белгија е под огромен притисок поради дебатата дали руските средства треба да бидат запленети и префрлени во Украина. Таквите предлози се рамни на кражба. Крадењето на замрзнатите средства на друга земја никогаш порано не било направено. Ова се пари што ѝ припаѓаат на Централната банка на Русија. Дури и за време на Втората светска војна, германските средства не биле конфискувани, туку само замрзнати“, кажа Де Вевер минатата недела.

Дипломатите велат дека надежта сè уште не е изгубена.

„Амбасадорите ќе ги разгледаат барањата на Белгија и ќе се обидат да ги решат. Сè уште има простор за маневрирање. Планот е да се приближат што е можно повеќе до белгиската позиција. Ако Де Вевер продолжи да го блокира планот, тој ќе се најде во непријатна позиција за лидер на земја која отсекогаш беше про-ЕУ“, кажа за „Политико“ еден европски дипломат запознат со дискусиите што се водат.

Тој додава дека Де Вевер би бил изолиран и игнориран исто како Виктор Орбан поради неговите политики во Унгарија.

„Пораката до Белгија е дека ако не се согласи, нејзините дипломати, министри и лидери ќе го изгубат својот глас во ЕУ, а листата на белгиските желби би била ставена на дното на купот“, кажа дипломатот.

Украина се соочува со буџетски дефицит од 71,7 милијарди евра следната година и ќе мора да ги намалува јавните трошоци од април ако не може да ги обезбеди парите. Бидејќи Доналд Трамп повторно се дистанцира од обезбедување поддршка, амбасадорите на ЕУ ќе се сретнат трипати оваа недела за да дојдат до решение.