Велика Британија, Франција и Германија го повикаа Иран да не ги ескалира тензиите и да се посвети на преговори, откако во саботата повторно беа воведени санкциите на Обединетите нации.

Трите земји, познати како Е3, соопштија дека враќањето на сеопфатните мерки против Техеран било „крајна мерка“ поради „континуираната нуклеарна ескалација“ и недостатокот на соработка од иранска страна.

„Го повикуваме Иран да се воздржи од каква било ескалаторна акција“, се вели во заедничката изјава, додавајќи дека „повторното воведување на санкциите на ОН не е крај на дипломатијата“.

Иранскиот претседател Масуд Пезешкијан минатата недела инсистираше на тоа дека земјата нема намера да развива нуклеарно оружје и го осуди враќањето на меѓународните санкции како „нефер, неправедно и незаконско“.

Сеопфатните економски и воени санкции на ОН беа повторно воведени во саботата на полноќ, една деценија откако беа укинати со значајниот меѓународен договор за нуклеарната програма на Иран, познат како Заеднички сеопфатен план за акција (JCPOA).

Иран ги засили своите забранети нуклеарни активности откако САД се повлекоа од договорот во 2016 година, за време на мандатот на претседателот Доналд Трамп, кој го критикуваше договорот како несоодветен.

Разговорите меѓу трите европски земји и Иран на маргините на Генералното собрание на ОН претходно оваа недела не успеаја да донесат договор што ќе го одложеше повторното воведување на санкциите.

Во заедничката изјава, министрите за надворешни работи на Е3 наведоа дека Иран постојано ги кршел своите обврски, поради што немале друг избор освен да ја активираат процедурата за враќање на санкциите. Тие ги споменаа одбивањето на Техеран да соработува со Меѓународната агенција за атомска енергија (МААЕ), неуспехот да им дозволи пристап на инспекторите до нуклеарните локации и да достави извештај за залихите на високо збогатен ураниум.

Иран ги суспендираше инспекциите на МААЕ откако Израел и САД во јуни бомбардираа неколку негови нуклеарни локации и воени бази. Според Договорот за неширење на нуклеарно оружје, Иран е законски обврзан да дозволи инспекции, а МААЕ во петокот потврди дека тие се обновени.

Иако претседателот Пезешкијан се повлече од претходните закани дека Иран ќе го напушти Договорот за неширење, тој побара гаранции дека неговите нуклеарни постројки нема да бидат нападнати од Израел за да се нормализира програмата за збогатување ураниум. Тој, исто така, го отфрли барањето на САД да ги предаде сите залихи на збогатен ураниум во замена за тримесечно ослободување од санкции.

Како одговор на враќањето на санкциите, Иран во саботата соопшти дека ги повикува своите амбасадори во Велика Британија, Франција и Германија на консултации.