Одлуката на Доналд Трамп да воведе нови царини за сите производи кои влегуваат во САД е голем удар за светската економија, изјави претседателката на Европската комисија, Урсула фон дер Лајен. Бројни држави, па и ЕУ, најавија контрамерки, што дополнително ќе ја засили светската трговска војна.
Трамп ја вклучи Европската Унија во групата од 60 држави на кои ќе им бидат наметнати повисоки реципрочни царини, покрај Кина, Јапонија, Индија и Јужна Кореја. Овој потег ја внесува Америка во најголемиот протекционизам од Големата депресија во 1930-тите.
Белата куќа кажа дека новите основни царини од 10% ќе почнат да се наплатуваат од 5 април, а повисоките царини за одредени држави од 9 април.
„Повеќе од пет децении Америка беше ограбувана и силувана од блиски и далечни народи, од пријатели и непријатели. Сега ќе ѝ наплатиме на Европската Унија. Тие се многу, многу тешки трговци. Би помислиле дека Европската Унија ни е пријател, но таа нѐ искористуваше и тоа е тажно да се гледа. Тоа е толку патетично. Затоа ќе ѝ воведеме царина од 20 отсто“, кажа Трамп, додавајќи дека дури бил нежен во одлучувањето.
Италијанската премиерка Џорџа Мелони прва реагираше од лидерите од ЕУ, велејќи дека потегот на Трамп е погрешен и не е во интерес на двете страни.
Администрацијата на Трамп особено беше навредена од нетарифните бариери на ЕУ, како што се данокот на додадена вредност и нејзините технолошки регулативи.
Унгарскиот министер за надворешни работи Петер Сијарто кажа дека ЕУ е сама виновна за новите американски царини.
„Повторно се докажа дека европските институции ги водат неспособни луѓе, кои исто така страдаат од многу сериозна Трампфобија. Бидејќи Европа има царини од 10% за САД во автомобилскиот сектор наспроти американските царини од 2,5% за Европа, европските царини требаше да се намалат на 2,5% и дури потоа би можеле да бидеме во преговарачка позиција“, изјави Сијарто.
Новите реципрочни тарифи нема да се однесуваат на веќе најавените царини за автомобили, челик и алуминиум.
„Царините се напад врз трговскиот систем кој донесе глобален просперитет и кој самата Америка помогна да се дизајнира. Целата глобална економија ќе страда од овие одлуки кои не се обмислени. Американската администрација тргнува на пат на кој на крајот ќе има само губитници“, рече германскиот канцелар Олаф Шолц.
