Француската влада планира да испрати „прирачник за преживување“ во секое домаќинство со инструкции како да се подготви за „неизбежна закана“, како што се војна, здравствена криза или природна катастрофа. Ако биде одобрен од премиерот Франсоа Бајру, прирачникот на 20 страници ќе биде испратен во секое домаќинство пред летото, објавија француските медиуми.

Книшката ќе биде поделена во три дела, со совети како да се заштитите себеси и оние околу вас, што да се прави ако заканата е неизбежна и како да се вклучите во одбраната на својата заедница. Во неа ќе има предлози како да се состави „комплет за преживување“, што би вклучувало најмалку шест литри вода, десетина конзерви храна, батерии и основни медицински залихи, објави радиото „Европа 1“.

„Целта на овој документ е да се обезбеди отпорност на населението во пресрет на криза, без разлика дали е природна, технолошка, кибернетичка или безбедносна“, кажа портпарол од француската влада.

Ова доаѓа откако претседателот Макрон кажа дека Франција ќе ги забрза и зголеми нарачките на борбените авиони „рафал“ за француските воздушни сили, со цел земјата да биде спремна ако сака да избегне војна.

„Сакам да верувам дека САД ќе останат на наша страна, но мора да бидеме спремни ако не биде така. Русија стана закана за Франција и Европа и ќе биде и во следните години“, кажа Макрон.