Германскиот парламент отфрли нацрт-закон за заострување на имиграциската политика предложен од опозицијата, два дена откако конзервативците беа обвинети дека прекршија договор за несоработка со крајната десница. По Втората светска војна не се случило Бундестагот да изгласа закон со помош на крајната десница.

Опозицискиот лидер Фридрих Мерц, чиј конзервативен блок ЦДУ/ЦСУ е фаворит на вонредните избори на 23 февруари, кажа дека новиот закон бил неопходен одговор на серија убиства на јавни простори извршени од лица со мигрантско потекло. Негови слични необврзувачки предлози беа изгласани во парламентот во средата благодарение на поддршката на пратениците од крајнодесничарската Алтернатива за Германија (АфД).

Мерц кажа дека не бара, ниту сака поддршка од АфД, но и покрај тоа, бившата канцеларка Ангела Меркел го критикуваше дека го прекршил ветувањето дека нема да соработува со крајната десница во парламентот.

„Вистинска одлука не станува погрешна само зашто погрешни луѓе ја прифатиле“, се бранеше Мерц.

Илјадници луѓе протестираа синоќа во Германија поради соработката на ЦДУ со АфД.

Една неодамнешна анкета покажа дека 67% Германци поддржуваат постојани гранични контроли, вклучувајќи над половина поддржувачи на Социјалдемократите на канцеларот Шолц. Нацрт-законот на Мерц предлагаше намалување на имиграцијата, укинување на правото на обединување на семејствата за барателите на азил и проширување на овластувањата на полицијата.