Лидерите на 16-те германски покраини побараа од Европската Унија да ја олабави заштитата на волците и да им дозволи на регионите да воведуваат различни политики за управување со дивите животни.

Според Штефан Вајл, премиерот на германската покраина Долнa Саксонија и претседател на Конференцијата на премиерите, правилата треба да овозможат застрелување на волците во области со голема популација на волци.

Во средата, фармери демонстрираа во Брисел во поддршка на олеснување на статусот на волкот.

„Волкот дефинитивно веќе не е вид на кој му се заканува исчезнување”, изјави Симон Даршајд од Здружението на одгледувачите на овци од Северна Рајна Вестфалија.

Независно од оградите за пасишта и кучињата за чување на стадата, Даршајд рече дека волците продолжуваат да ги убиваат неговите овци.

„Волкот мора да биде деградиран од највисокото ниво на заштита во законот за заштита на видовите на ЕУ”, изјави Удо Хемерлинг од Германското здружение на фармерите.