Американските обвинители денеска го обвинија градоначалникот на Њујорк, Ерик Адамс, дека добил нелегални средства, мито и луксузни патувања од турски државјанин, што ја доведе во хаос најголемата градска управа во САД.

Во обвинението на 57 страни, обвинителите опишаа наводна шема која се протегала до 2014 година и ја помогнала градоначалничката кампања на Адамс во 2021, при што тој добивал бесплатни соби во луксузни хотели и оброци во скапи ресторани. За возврат, Адамс ги притискал градските власти да го одобрат отворањето на новата зграда на турскиот конзулат од 36 ката, и покрај грижите за безбедноста.

Адамс (64) се соочува со пет кривични дела, вклучувајќи заговор и измама. Тој ги негира обвинувањата и кажа дека нема да се повлече од функцијата.

„Ќе ја продолжам мојата работа како градоначалник“, изјави Адамс.

Поранешниот полициски капетан е првиот од досегашните 110 градоначалници на Њујорк кој ќе биде кривично гонет додека е на функција. Гувернерката на Њујорк, Кејти Хочал, би можела да го тргне од функцијата, но процесот е сложен, велат експертите.