Хрватска планинарка загина, а седуммина нејзини колеги се спасени во акцијата на албанската горска служба на спасување, која вчера се одвиваше на Езерски Врв на масивот Проклетие. Во спасувачката акција учествувале хеликоптер на министерството за одбрана и полиција.

Потврдено е дека загинала 43-годишна жена од Осиек, за која хрватските медиуми објавија дека била научник, а спасени се четворица државјани на Хрватска и тројца на Србија.

„Планинарка од Хрватска загина откако се лизнала при качувањето близу Езерски Врв, а остатокот од тимот веднаш повикал помош. Таа е пронајдена без знаци на живот“, објави албанската горска служба на спасување.

Со своите 2.694 метри, Езерски Врв е највисокиот врв на Динаридите и втор по височина во Албанија.