Украина ќе учествува во мировните разговори, изјави портпаролот на Кремљ, Дмитри Песков, откако Володимир Зеленски предупреди дека неговата земја нема да прифати никаков мировен договор помеѓу Доналд Трамп и Владимир Путин ако не биде вклучена и Украина.

„Украина, се разбира, на овој или оној начин ќе учествува во преговорите. Ќе има билатерална страна на тие разговори помеѓу САД и Русија и страна што ќе биде поврзана со учеството на Украина“, кажа Песков.

Американскиот министер за одбрана Пит Хегсет исто така кажа дека во преговорите ќе бидат вклучени и Путин и Зеленски.

„Договорениот мир ќе содржи елементи што ниедна страна не ги сака, но границите од 2014 нема да можат да се вратат“, изјави Хегсет, алудирајќи на годината кога Русија го анектираше Крим.

Зеленски претходно кажа дека не може да има разговори за Украина без Украина.

„И Европјаните мора да бидат на преговарачката маса. Му реков на Трамп дека главен приоритет на Украина е да добие безбедносни гаранции, кои не се можни без американска поддршка“, кажа Зеленски.

Шефот на НАТО Марк Руте изјави дека Украина мора да биде ставена во најдобрата позиција за преговорите.

„Без разлика на исходот на преговорите, мораме да бидеме сигурни дека Путин нема да се обиде да зграпчи ниеден нов километар од Украина. Не знам што размислува Путин. Сум имал многу средби со него. Тој е силен преговарач, но непредвидлива личност“, кажа Руте, додавајќи дека членството на Украина во НАТО никогаш не било услов за мировните преговори.