Иран погоди и запали два танкера во ирачките води откако ги засили своите напади врз нафтени и транспортни постројки низ Блиски Исток, предупредувајќи дека цената на нафтата би можела да порасне до 200 долари за барел, што е во спротивност со тврдењето на Доналд Трамп дека САД веќе победиле во војната.
Во американско-израелските напади врз Иран досега загинаа речиси 2.000 цивили, а глобалните енергетски пазари и транспортот се фрлени во хаос.
На митинг во Кентаки, Трамп кажа дека САД ја добиле војната, но не сакаат да се враќаат на секои две години.
„Не сакаме порано да си заминеме. Мора да ја завршиме работата“, рече Трамп.
Глобалните цени на нафтата утрово повторно стигнаа до 100 долари за барел, пораснувајќи за речиси 10% во однос на вчера, поради обновените стравувања за прекин на снабдувањето.
Ирански бродови наполнети со експлозив нападнале два танкера во ирачките води, при што тие се запалија и едно лице загина. Ова следува откако вчера беа нападнати три товарни брода во заливските води. Иран исто така нападна танкери во Бахреин и складиште за нафта во Оман.
Иранските власти јасно ставија до знаење дека имаат намера да наметнат продолжен економски шок, додека војната продолжува, при што Меѓународната агенција за енергија објави дека 32 држави се согласиле да ослободат 400 милиони барели нафта од глобалните стратешки резерви заради стабилизирање на цените, што е најголемата таква интервенција во историјата.
„Оваа одлука значително ќе ги намали цените на нафтата додека ставаме крај на оваа закана за Америка и светот“, рече Трамп.
Засега нема знаци дека бродовите можат безбедно да пловат низ Ормускиот Проток, низ кој вообичаено минува една петина од светската нафта. Портпарол на иранската војска вчера изјави дека преминот е „несомнено под контрола на Иран“, а групата Г7, во која членуваат САД, Канада, Јапонија, Италија, Велика Британија, Германија и Франција, се согласи да ги испита опциите за обезбедување на бродовите за да можат слободно да се движат во Заливот.
„Протокот е во одлична состојба. Ги уништивме сите ирански бродови. Имаат уште некои ракети, но не многу“, кажа Трамп.
