Премиерката Џорџа Мелони беше критикувана од италијанската опозиција откако нејзиниот план за испраќање 3.000 мигранти во Албанија месечно третпат беше отфрлен од италијанскиот суд.

Четириесет и тројца мигранти од Африка и Јужна Азија беа вратени во Бари од мигрантскиот центар во албанскиот град Ѓадер откако апелацискиот суд во Рим пресуди дека овие лица, на кои им беше одбиено барањето за азил, не смеат да се држат во странство.

„Џорџа Мелони би требала да поднесе оставка. Овие центри во Албанија не работат и нема да работат. Тие се голем неуспех“, кажа Ели Шлајн, лидерката на левичарската Демократска партија, додавајќи дека проектот досега чинел една милијарда евра.

Рикардо Маџи од либералната партија Повеќе Европа кажа дека последната судска пресуда е потврда дека мигрантските центри во Албанија работат целосно незаконски.

Ова е трета ваква пресуда откако на 11 октомври беа отворени двата центра во Албанија, кои беа фалени од европските лидери. Истиот месец, судот во Рим блокираше трансфер на 12 мигранти во Албанија, а во ноември на седуммина други. За секој случај, судиите му ја препуштија конечната пресуда на Европскиот суд на правдата, кој ќе расправа за ова на 25 февруари.