Израел ја хакирал широката мрежа на сообраќајни камери во Техеран за да ги следи телохранителите на врховниот водач на Иран, Али Хамнеи и други високи ирански функционери, објави „Фајненшл тајмс“, повикувајќи се на два добро запознати извора. Се верува дека камерите се дел од државниот апарат за надзор, што овозможува да се идентификуваат и гонат демонстрантите и противниците на режимот.

Израел добил пристап до камерите пред неколку години и открил дека една одредена камера покажува каде членовите на безбедносниот тим на Хамнеи ги паркираат своите автомобили. Преку камерите, израелската разузнавачка служба составила досиеја за адресите и работните распореди на стражарите и кого биле назначени да штитат.

Израел и САД, исто така, го прекинале мобилниот сервис на улицата Пастер во Техеран, каде што беше убиен Хамнеи, па оние кои би се обиделе да стигнат до телохранителите и да достават можни предупредувања би добивале сигнали за зафатеност, според весникот.

„Го знаевме Техеран како што го знаеме Ерусалим. И кога го познавате местото исто толку добро како улицата на која сте пораснале, забележувате кога нешто не е на свое место“, изјави израелски разузнавачки службеник за „Фајненшл тајмс“.

Израелците користеле свои алатки и алгоритми за вештачка интелигенција за да ги сортираат податоците што ги собирале за раководството на Иран и нивните движења, кажа еден извор. Тоа им овозможило да го следат Хамнеи до состанокот во саботата и ги уверило Мосад и ЦИА дека и други високи функционери се на пат кон тоа место, каде што биле погодени. ЦИА имала и човечки извор кој обезбедил клучни разузнавачки информации, според изворите.