Израелскиот министер за одбрана Израел Кац објави дека војската ќе ги прошири своите операции во Газа и ќе заземе големи нејзини делови, за да ги вклучи во таканаречените безбедносни зони. Кац кажа дека ова има за цел да ја исчисти областа од терористи и терористичка инфраструктура, што ќе бара и голема евакуација на цивили.

Извештаи од Газа велат дека Израел извел големи воздушни напади и бомбардирања долж египетската граница и постојат стравувања дека се спрема нова копнена офанзива. Оваа недела, Израел им нареди на 14.000 луѓе да го напуштат северниот град Рафа.

Израел ги обнови борбените операции во Газа на 18 март, прекинувајќи го двомесечното примирје, откако го обвини Хамас дека ги одбил предлозите за ослободување на преостанатите 59 заложници.

Објавувајќи ги плановите за заземање уште територии, Кац ги повика жителите на Газа да се ослободат од Хамас и да ги пуштат заложниците. Тој не појасни колкава територија ќе биде заземена и дали тоа значи трајна анексија. Според групата за човекови права „Гиша“, Израел веќе контролира 17% од Газа како дел од тампон зона.

Хуманитарната ситуација во Газа драстично се влоши во изминатите недели, зашто Израел не дозволува достава на помош од 2 март, што е најдолга блокада од почетокот на војната.