Јапонскиот премиер Шигеру Ишиба поднесе оставка по помалку од една година на функцијата, што уследи по два изборни пораза. Неговата Либерално-демократска партија (ЛДП) утре требаше да гласа за разрешувањето на Ишиба.

ЛДП ја води Јапонија речиси седум децении, но под водство на Ишиба го изгуби мнозинството во двата дома на парламентот. Јапонија сега се соочува со период на политичка неизвесност, во време кога растат регионални тензии.

Ишиба, кој до денеска ги отфрлаше повиците за оставка, кажа дека сега е вистинското време за повлекување, откако Јапонија постигна трговски договор со САД. Тој ќе продолжи да ја врши функцијата додека не се избере нов премиер.

Ишиба ја презеде функцијата во октомври 2024, ветувајќи дека ќе се справи со растечките цени, но се мачеше да стекне доверба кај јавноста, додека земјата се соочуваше со економски тешкотии и проблематични политички односи со САД.